Eyðdis Hartmann Niclasen, landsstýriskvinna, hevur verið á vitjan í Suðuroynni, har hon hevur vitjað stovnar undir Heilsu- og orkumálaráðnum og havt fundir við kommunalar myndugleikar.
Vitjanin byrjaði á Suðuroyar sjúkrahúsi, har landsstýriskvinnan varð víst runt og fekk høvi at heilsa upp á starvsfólk og hoyra nærri um virksemið á sjúkrahúsinum.
Síðani gekk leiðin til Suðuroyar apotek á Tvøroyri, sum fyribils húsast í gamla posthúsinum, meðan umvælingar verða gjørdar á verandi bygning hjá apotekinum.
Á Tvøroyri hevði landsstýriskvinnan eisini fund við borgarstjórar og býráðslimir úr Tvøroyrar kommunu, Hvalbiar kommunu og Fámjins kommunu. Á fundinum varð millum annað tosað um hølisviðurskifti til heilsutænastur í nærumhvørvinum.
Seinnapartin var landsstýriskvinnan á Hamragarði í Vági, har hon hevði fund við stýrið og stjóran fyri Bú- og heimatænastuna í Suðuroynni. Á fundinum legði Rúni Rasmussen, verkætlanarleiðari, fram strategi fyri Bú- og heimatænastuna í Suðuroy, ið lýsir hvussu eldraøkið skal mennast fram ímóti 2035. Eisini varð tosa um arbeiði, tænastur og avbjóðingar á eldraøkinum í Suðuroynni.
Vitjanin endaði við fundi í Vágs kommunu saman við borgarstjórunum úr Vágs kommunu, Hovs kommunu, Porkeris kommunu og Sumbiar kommunu. Har varð tosað um heilsumiðstøðir og eldraøkið.
Landsstýriskvinnan er sera glað fyri ein áhugaverdan og læruríkan dag í Suðuroy.
Sí fleiri myndir við at trýsta á myndina ovast í skrivinum.
Mynd 1-2: Vitjan á Suðuroyar sjúkrahúsi
Mynd 3-4: Vitjan á apotekinum á Tvøroyri
Mynd 5: Uttan fyri Hamragarð í Vági at hava fund við stýrið fyri Suðuroyar Bú- og heimatænastu
Mynd 6: Á fundi við borgarstjórar og býráðslimir úr Tvøroyrar kommunu, Hvalbiar kommunu og Fámjins kommunu
Mynd 7: Á fundi við borgarstjórar úr Vágs kommunu, Porkeris kommunu, Hovs kommunu og Sumbiar kommunu.